ფიქრობთ საზღვარგარეთ სწავლაზე? გირჩევთ, გაეცნოთ სიას: „2013 წლის 10 საუკეთესო სტუდენტური ქალაქი“. ამ სიაში მოხვედრის შანსი რომ ჰქონდეს, ქალაქის მოსახლეობა უნდა აღემატებოდეს 250,000-ს და აქ უნდა იყოს მინიმუმ ორი უნივერსიტეტი QS-ის მსოფლიო უნივერსიტეტების რეიტინგის ასეულიდან. გთავაზობთ აღნიშნულ ათეულს.
10. მიუნხენი
ბერლინი ამჯერად აღმოჩნდა ტოპ-10 პოზიციის მიღმა, თუმცა, მიუნხენი 3 პოზიციით დაწინაურდა 2012 წლის შემდეგ. მიუნხენი გერმანიის სიდიდით მესამე ქალაქია და ის ყოველწლიურად მასპინძლობს ოქტობერფესტის სახალხო დღესასწაულს. ქალაქის ყველაზე მაღალრეიტინგული უნივერსიტეტებია Technische Universitat Munchen და LMU Munchen.
9. მონრეალი
ცნობილია, როგორც კანადის კულტურული დედაქალაქი. მონრეალის უნივერსიტეტი Montreal’s McGill University 21-ე ადგილზე იმყოფება QS რეიტინგის მიხედვით. მას უმაღლესი ქულა აქვს მრავალეროვანი სტუდენტების კატეგორიაში, ხოლო ყველაზე დაბალი ქულა კი ხელმისაწვდომობის მიხედვით ეძლევა.
8. ბოსტონი
ბოსტონი ერთ-ერთი უძველესი, უმდიდრესი და კულტურულად ყველაზე მნიშვნელოვანი დიდი ქალაქია აშშ-ში. წარსულში ცნობილი იყო, როგორც „ამერიკის ათენი“, ნაწილობრივ იმის გამოც, რომ აქ უამრავი დიდი ისტორიის მქონე უნივერსიტეტია. თუმცა, მაღალი გადასახადი სწავლაზე ბოსტონის საერთო ქულებს ამცირებს.
7. ჰონგკონგი
ჰონგკონგი მსოფლიოს ერთ-ერთი ყველაზე მჭიდროდ დასახლებული ქალაქია როგორც მოსახლეობის, ასევე მაღალრეიტინგული უნივერსიტეტების მიხედვითაც. მათში შედის HKUST, HKU და Chinese University of Hong Kong . გადასახადი მაღალია, თუმცა საკვებისა და ტრანსპორტირების ხარჯები მცირეა.
6. ციურიხი
ციურიხში არის ETH Zurich, ევროპის ყველაზე მაღალრეიტინგული უნივერსიტეტი, რომელიც ამჯერად, რეიტინგით მე-12 ადგილზეა. ეს ქალაქი ყველაზე დიდია შვეიცარიაში, ხოლო საცხოვრებელი ხარჯები საკმაოდ მაღალია უცხოელი სტუდენტებისათვის.
5. მელბურნი
ერთ-ერთია ავსტრალიის იმ ორი ქალაქიდან, რომლებიც ტოპ-10-ეულში მოხვდნენ. მელბურნს უნივერსიტეტების რეიტინგის მიხედვით აქვს უფრო მაღალი ქულა, ვიდრე სიდნეის. The University of Melbourne იმყოფება 31-ე ადგილზე. სწავლის საფასურის სიძვირე უცხოელი სტუდენტებისათვის და მაღალი საცხოვრებელი ხარჯები ამცირებენ მის ქულებს.
4. სიდნეი
მოცემულ რეიტინგში კი სიდნეი უსწრებს მელბურნს და მე-4 ადგილზე იმყოფება. აქ არის 5 უნივერსიტეტი QS-ის რეიტინგიდან და მეტად მრავალფეროვანი სტუდენტური საზოგადოება. The University of Sydney არის 38-ე პოზიციაზე რეიტინგში, University of New South Wales კი 52-ეზე.
3. Ⴑინგაპური
ეს ქალაქ-სახელმწიფო ცნობილი არის არამარტო მისი აყვავებით, არამედ დანაშაულების დაბალი მაჩვენებლით. The National University of Singapore (NUS) არის 24-ე მსოფლიოში, ხოლო Nanyang Technological University არის 41-ე.
2. ლონდონი
21 უნივერსიტეტით QS-ის რეიტინგში, ნამდვილად არ არის გასაკვირი, რომ ლონდონი მოწინავე ადგილზეა ჩვენს ათეულშიც. იგი მხოლოდ 3 ქულით ჩამორჩება პირველადგილოსანს. მის უნივერსიტეტებს შორისაა: UCL, Imperial, KLC და LSE.
1. პარიზი
პარიზი უკვე მეორე წელია პირველ ადგილზეა. მისი უნივერსიტეტებიდან 17 იმყოფება QS-ის რეიტინგში. მათ შორისაა: Science Po, ENS Paris, Ecole Polytechnique და Sorbonne. მართალია, პარიზში საცხოვრებლად ნამდვილად დიდი ხარჯებია საჭირო, მაგრამ შედარებით დაბალი სწავლების საფასური მათ ანაზღაურებს და ქულებს მატებს პარიზს.
www.telegraph.co.uk
თარგმნა თათია ჟორჟოლიანმა
